Radio Kalabria- Me ju dhe vetem per ju

Shkarkoni audio fajllin per te degjuar radio kalabrine

Posts by Category

BE-ja heq urgjentisht vizat për turqit në shkëmbim të korridorit për refugjatët

Turqia, duke e ditur se ka në dorë një kartë me vlerë, situatën dëshpëruese në të cilën është gjendur BE-ja, për shkak të krizës së refugjatëve, ka kërkuar dhe si duket edhe ka marrë nga BE-ja gjëra që deri vonë dukeshin të pabesueshme.

Në një samit të jashtëzakonshëm, të zhvilluar në Bruksel, të hënën, gjatë ditës, e që ka përfunduar pas mesnate, është rënë dakord për një plan të propozuar nga Turqia, i cili cilësohet si “kthesë” në menaxhimin e krizës së refugjatëve. Këtë e ka thënë edhe kancelarja gjermane, Angela Merkel, duke përshëndetur bashkëpunimin e Turqisë.

BE-ja i ka ofruar Turqisë atë që deri dje është dukur e pabesueshme: heqjen e vizave qysh në qershor të këtij viti. Turqia do të pranojë të gjithë refugjatët ilegalë që nga territori i saj hyjnë në Greqi, ndërkohë që për një të kthyer në Turqi BE-ja do të zhvendosë në BE një sirian nga kampet e refugjatëve në Turqi.

Këto pika të një marrëveshjeje të arritur në samitin e BE-së me Turqinë duhet të sqarohen në detaje në tetë ditët e ardhshme./Koha ditore

KEK-u synon t’ia zgjasë jetën “Kosovës A” edhe për 15 vjet të tjerë

Termocentrali “Kosova A” nuk do të mbyllet në fund të vitit 2017. Zgjatja e jetës së këtij termocentralin për qeverinë është opsion i pashmangshëm, duke marrë parasysh vonesat që janë bërë në ndërtimin e termocentralit “Kosova e Re”, i cili do të mund të hyjë në funksion në vitin 2022, nëse gjithçka shkon sipas planifikimit, shkruan sot Koha Ditore.

Në Qeverinë e Kosovës dhe në KEK ekziston ideja që “Kosova A” të mbetet në funksion edhe pas vitit 2023, kur në sistem do të inkuadrohen “Kosova e Re” dhe “Kosova B” e rivitalizuar.

Ministri i Zhvillimit Ekonomik, Blerand Stavileci, ka thënë se dekomisionimi i termocentralit “Kosova A” është i lidhur me komisionimin e termocentralit të ri “Kosova e Re”. Në Forumin e nivelit të lartë për energjinë, ai ka thënë se do të bëhet një studim i fizibilitetit për këtë termocentral.

Hasan Preteni synon pozitën e kryeshefit të Inspektoratit Policor

Pozita e kryeshefit ekzekutiv të Inspektoratit Policor të Kosovës (IPK) ka nxitur interesim të madh, shkruan sot Koha Ditore.

Duke qenë se mandati i kryeshefit aktual, Fitim Shishani, përfundon pas dy muajsh (më 6 maj), konkursi ishte hapur javë më parë, kurse është mbyllur të premten.

Gazeta është informuar se në mesin e kandidatëve, të cilët kanë aplikuar ka drejtorë, ish-drejtorë, majorë, kolonelë e togerë.

“Axos” nuk ka të drejtë të padisë Kosovën

Nuk dihet ende se si do të përfundoj beteja ligjore mes Qeverisë së Kosovës dhe kompanisë “Axos”.

Kompania “Axos” në vitin 2013 ishte shpallur fituese e tenderit për blerjen e 75 për qind të aksioneve të Postës dhe Telekomit të Kosovës (PTK). Privatizimi dështoi, pasi që në fund të vitit 2014 deputetët e Kuvendit të Kosovës nuk e votuan privatizimin e saj.
Kompania “Axos” me 4 qershor 2015 e kishte paditur Qeverinë e Kosovës në Gjykatën Ndërkombëtare të Arbitrazhit (GJNA). Për këtë rast Qeveria më 2 shtator të vitit të kaluar ndau 200 mijë euro për mbrojtje ligjore të saj në GJNA.

Por , ish ministri i Zhvillimit Ekonomik, tash deputet, Besim Beqaj tha për KosovaPress se kompania “Axos” nuk ka të drejtë ta padisë Qeverinë e Kosovës. Sipas tij, në kontratën që kanë nënshkruar të dyja palët bëhet me dije se Qeveria ka të drejtë në çdo kohë, deri në nënshkrim të kontratës, pa shpjegim, ta ndal procesin dhe kjo ndalje e procesit nuk i jep të drejtë ofertues it për të ngritur çfarëdo lloj padie ndaj Qeverisë apo ndaj agjentëve të tjerë të cilët mund ti angazhon Qeveria për këtë proces.

“Në dokumentet e tenderit është e specifikuar qartë që ofertuesi nuk ka të drejtë të paditë palën, në këtë rast Qeverinë, sepse është rregulluar mbi bazën e dokumenteve të transaksionit. Në dokumentin e transaksionit thuhet qartë që Qeveria ka të drejtë në çdo kohë deri në nënshkrim të kontratës, pa shpjegim, ta ndal procesin, dhe kjo ndalje e procesit nuk i jep të drejtë ofertuesit për të ngritur çfarë do lloj padie ndaj Qeverisë apo ndaj agjentëve të tjerë të cilët mund ti angazhon Qeveria për këtë proces. Mbi këtë bazë ata nuk kanë të drejtë. Ofertuesi i cili ka ofertuar dhe i cili është shpallur si fitues i para-supozuar, i ka nënshkruar këto dokumente dhe është shumë e qartë në dokumente se ai nuk ka të drejtë për ta bërë padinë.” tha Beqaj.

Beqaj është i sigurt se në këtë rast do të humbasë kompania “Axos”.

“Qeveria ka të drejtë deri në nënshkrim të kontratës për ta ndalë procesin pa shpjegim. Kjo është baza mbi të cilën duhet të ndërtohet edhe mbrojtja të cilën bëhet, a e bënë ministria, a e bënë qeveria apo ndonjë përfaqësues tjetër të cilin qeveria e emëron për ta përfaqësuar në proces të arbitrazhit. Unë jam shumë i bindur se kjo procedurë është shumë e thjeshtë. Vetëm mund të bëjnë gabime në procedurat apo afatet kohore të cilat mund ti kushtojnë pastaj shtetit”, tha Beqaj.

Ndërsa, Haki Shatri, ish ministër i Financave, tha përmes telefonit për KosovaPress se dikush duhet të jap përgjegjësi për këtë proces.

“Më shumë se akuza dhe humbja eventuale e rastit, dëme Kosovës i sjell edhe papërgjegjësia institucionale. Asnjë ministër nuk dha përgjegjësi politike për këtë dështim”, tha Shatri.

Ai po ashtu ka rikujtuar edhe shpenzimet milionëshe të kontraktuara nga Qeveria për Këshilltarë të Transaksionit e që në fakt askush nuk ka dhënë përgjegjësi për to.

Nga ana tjetër, Blerim Grainca, anëtar i Komisionit për Zhvillim Ekonomik, i tha KosovaPress-it se nuk mund të paragjykoj për vendimin por ai tha se pala që është ankuar ka parë mundësin e ankesës.

“Ka ndodhur procesi i privatizimit dhe nuk janë plotësuar disa nga kushtet e asaj kontrate d he me sa di unë tani lënda është në Gjykatën e Arbitrazhit. Pritet në një të ardhme të afërt të zgjidhet definitivisht”, tha Grainca.

Ministria e Zhvillimit Ekonomik, e pyetur se në cilën fazë është ky proces, nuk kanë preferuar të përgjigjen. Por, sipas dokumentit të ITP , të cilën e ka siguruar “KosovaPress”, me të cilin rregullohej çështja e privatizimit të PTK, Neni 1 paragrafi 5, thuhet:

“Autoriteti kontraktues e rezervon të drejtën për të anuluar tenderin apo për ta deklaruar të pavlefshëm apo pa efekt në lidhje me tenderin apo në lidhje me cilin do ofertues individual, për cilëndo arsye, deri në momentin e nënshkrimit të dokumenteve të transaksionit dhe një veprim i tillë nuk ia jep të drejtën ofertuesit – ofertuesit te përzgjedhur të bëjë padi për çfarëdo arsye ndaj KQP, Qeverise se Kosovës apo ndaj agjentit, përfaqësuesve, këshilltareve apo konsulentëve”.

Qever ia e Kosovës ka vendosur që kompania “Patton Boggs” të jetë përfaqësuesja e saj ligjore për të zgjidhur këtë kontest. Për këtë përfaqësim ligjor të Kosovës në Gjykatën e Arbitrazhit kompania “Patton Boggs” ka kërkuar të paguhet në vlerë prej 17 mijë e 700 dollarë.

Përndryshe “Axos”, jo zyrtarisht mësohet se ka kërkuar nga 20 deri në 50 milion euro dëmshpërblim nga Qeveria e Kosovës. Tashmë mbetet të shihet se si do të vendos Gjykata e Arbitrazhit për këtë rast.

Opozita shqyrton largimin nga Kuvendi i Kosovës

Tri partitë politike në opozitë, Lëvizja Vetëvendosje, Aleanca për Ardhmërinë e Kosovës dhe Nisma për Kosovën, janë duke e shqyrtuar mundësinë e largimit nga Kuvendi i Kosovës, në kuadër të përpjekjeve për ta dërguar vendin në zgjedhje të parakohshme.

Konsultimet lidhur me vendimin final të tyre janë duke vazhduar, thonë në partinë Aleanca për Ardhmërinë e Kosovës dhe Nisma për Kosovën.

Nënkryetari i Aleancës për Ardhmërinë e Kosovës, Ahmet Isufi, tha për Radion Evropa e Lirë, se ka shumë faktorë, të cilët mund të ndikojnë për ta shtyrë opozitën që të largohet nga parlamenti.

“Jemi në konsultime e sipër për veprimet demokratike, të cilat duhet të ndodhin dhe si opozitë do të shfrytëzojmë mundësinë që t’i bëjmë veprimet, duke e detyruar qeverinë të tërhiqet, sepse ka bërë shkelje të renda në interes të qytetarëve të Kosovës dhe po ashtu ka shkelur Kushtetutën e Kosovës”, tha Isufi.

Ndërkaq, kryetari i Nismës për Kosovën, Fatmir Limaj tha për Radion Evropa e Lirë se vazhdimi i përdorimit të gazit lotsjellës në seancat e Kuvendit është i panevojshëm.

Limaj thotë se opozita duhet ta trajtojë seriozisht qëndrimin në Kuvend, sidomos pas vendimit të Gjykatës Kushtetuese lidhur me marrëveshjen e arritur në Bruksel mes Kosovës dhe Serbisë, për themelimin e Asociacionit të Komunave me Shumicë Serbe.

“Këto institucione janë të paligjshme, nuk kanë legjitimitet për të vazhduar qeverisjen në vend. Mendimi im është që opozita nuk ka dhe nuk do të duhej të vazhdojë me atë protestën e gazit lotsjellës në parlament, por thjesht duhet të ulet dhe të trajtojë seriozisht a ia vlen të qëndrohet me tutje në parlament apo jo, pasi ato institucione e kanë humbur legjitimitetin”, tha Limaj.

Subjektet politike në opozitë, Marrëveshjen për Asociacionin, e shohin si të dëmshme për tërësinë territoriale të Kosovës. Gjykata Kushtetuese e Kosovës e ka dhënë interpretimin e saj mbi kushtetutshmërinë e Marrëveshjes, duke thënë se disa pjesë të saj nuk janë në harmoni me Kushtetutën.

Dhe derisa në AAK dhe Nisma për Kosovën thonë se janë duke e shqyrtuar bashkërisht ketë çështje edhe me Lëvizjen Vetëvendosje, kjo e fundit nuk e ka pohuar e as mohuar një gjë të tillë.
Në Lëvizjen Vetëvendosje, i thanë Radios Evropa e Lirë se aktualisht nuk ka një qëndrim lidhur me largimin ose jo të opozitës nga Kuvendi.

“Ajo çka mund t’ju konfirmojmë është se ne do të marrim pjesë në seancën e thirrur për 10 mars”, tha Tinka Kurti nga kjo Lëvizje.

Në anën tjetër, Fatmir Limaj thekson se meqë institucionet kanë humbur legjitimitetin e vet, e vetmja zgjidhje është që vendi të shkoj në zgjedhje.

“Është e rëndësishme që opozita është e bashkuar dhe do të vazhdojë se bashku me të gjitha format e protestimit dhe largimit të kësaj qeverie, e cila është anti-kushtetuese dhe qëndrimi i qartë i opozitës është [se duhet mbajtur] zgjedhjet e parakohshme. Ne duhet të punojmë fuqishëm në drejtim të zgjedhjeve të parakohshme, sepse mendoj se kjo është ajo që e nxjerr vendin nga kriza”, u shpreh Limaj.

Ndërkohë, partitë politike në pushtet vazhdojnë t’u bëjnë thirrje atyre në opozitë që t’i kthehen punës në Kuvendin e Kosovës dhe t’i lënë anash bojkotet, bllokadat dhe protestat.

Kryesia e Kuvendit ka caktuar tashmë seancën e radhës për të enjten, më 10 mars.

Por, edhe tri partitë opozitare të Kosovës kanë paralajmëruar protestë për datën më 26 mars, për të kontestuar legjitimitetin e institucioneve aktuale dhe për të kërkuar mbajtjen e zgjedhjeve të parakohshme./koha.net

 

Të mërkurën ndërprerje rryme në disa rajone

KEDS sha njofton se nesër, e mërkurë, do të ketë ndërprerje të planifikuara rryme në disa rajone të Kosovës, transmeton Koha.net.

1.

Më 09.03.2016 në NS 110/10kV Peja2 do të shkyçet:

• Dalja 10 kV Kastrati (kodi: 51000007) prej orës 09:00 deri në orën 12:00 dhe prej orës 14:00 deri në orën 16:00

Gjatë kohës sa do të zgjasin punimet pa furnizim me energji elektrike do të mbesin: Lagja Dardania, Llozhani, Zllopeku, Poqesta, Belinca, Doberdoli, Babiqi, Pistoni dhe Sedefi.

Arsyeja e shkyçjes: realizimi i punimeve për shtrirjen e rrjetit 0.4kV ne pozicionin Kolonia te KEDS.
2.

Më 09.03.2016 në NS 110/10 kV Klina do të shkyçet:

• Dalja 10 kV Gremniku (kodi: 520000011) prej orës 13:00 deri në orën 15:00.

Gjatë kohës sa do të zgjasin punimet pa furnizim me energji elektrike do të mbesin: Gremniku, Dollci, Qupeva, Vlljaku, Dushi, Sferka, Perqeva, Rastoka, Kpuzi dhe Qeskova.

Arsyeja e shkyçjes: Ndërrimi i shtyllës në tensionin e mesëm 12//1000 në fshatin Gremnik.
3.

Më 09.03.2016 NS 35/10 kV Isniq do të ketë shkyçje në:

• LP 10kV Zukaj-Gurthyesi (53057001) prej orës 11:00 deri në orën 14:00.
Gjatë kohës sa do të zgjasin punimet pa furnizim me energji elektrike do të mbesin: Gurëthyesi (Zukaj)

Arsyeja: Ndërrimi i ndërprerësit të fuqisë.

Prizreni

1.

Më 09.03.2016 ( e mërkurë ) në TS 35/10 kV Therandë do të shkyçet:
• Dalja 10 kV Reshtani (32039006) prej orës 09:30 deri në orën 12:00.

Gjatë kohës sa do të zgjatin punimet pa furnizim me energji elektrike do të mbesin: Therandë -Lagjja e Bajraktarëve, Rreshtani, rr. Reshtani, Reshtani 1, Reshtani Sharra, Skenderbeu, Therandë Varrezat 11, Therande Kallderma 12 .

Bordi i KUR ”Prishtina” shkarkon Gjelosh Vatajn

ordi i Drejtorëve të KUR “Prishtina” sh.a. , përmes një kumtese për medie njofton se në mbledhjen e vet të jashtëzakonshme mbajtur më 08.03.2016, ka marrë vendim për shkarkimin e kryeshefit ekzekutiv Gjelosh Vataj dhe zyrtarit kryesor Financiar Selatin Retkoceri, transmeton Koha.net.

Kumesta thotë se “Arsyetimi për shkarkimin e Vataj dhe z. Ratkoceri është i bazuar në të gjeturat e specifikuara në raportet e Auditimit të Brendshëm mbi shkeljet etike e ligjore në kontekst të legjislacionit të prokurimit publik, të pasqyruara në raportin e Auditimit të Brendshëm te proceset e prokurimit dhe furnizimeve; deklarimin dhe raportimin e pasaktë financiar te raporti i TM4, përkatësisht pasqyrave financiare; brengat e grupeve të interesit për ecurinë etike të biznesit / shërbimeve dhe projekteve kapitale; humbjen e besimit të publikut, rrezikun e dëmtimit të reputacionit të ndërmarrjes; mos rikuperimin e raporteve me palët e interesit përfshirë komunat dhe donatorët; mos reflektimin relevant dhe konsistent karshi rekomandimeve të Bordit të Drejtorëve dhe komitetit të auditimit, lidhur me aktivitetet biznesore të ndërmarrjes KUR “Prishtina” sh.a.; mosefiçiencën dhe efikasitetin menaxherial të ndërmarrjes në kontekst financiar, të performancës, teknik e operativ; zbehjen e marrëdhënieve me donatorët dhe institucionet vendore e ndërkombëtare; krijimin e grupeve / klaneve me qëndrime dhe prononcime të kundërta lidhur me gjendjen e ndërmarrjes, të cilat kanë krijuar amulli për një informim të drejtë të opinionit dhe palëve me interes”.

Gjelosh Vataj nga Bordi i Drejtorëve ishte shkarkuar edhe më 15 gusht të vitit të shkuar. Në atë kohë drejtor ishte emëruar Selatin Retkocerti.
Por Vataj u kthye u sërish në fund të vitit në këtë post..k/net

EULEX-i përkrah femrat në Kosovë në ndërtimin e një sistemi të pavarur të drejtësisë

Me rastin e Ditës Ndërkombëtare të Gruas, EULEX-i i bashkohet betejës së të gjitha grave në mbarë botën për të drejta të barabarta të gruas dhe për barazi gjinore. Po ashtu, kjo ditë shërben si përkujtim i asaj se barazia gjinore mbetet sfidë e rëndësishme mbarë-botërore, përfshirë edhe Kosovën.

Këtë vit, OKB-ja e ka përsëritur zotimin e saj për barazinë gjinore duke e shpallur qëllimin e saj për ta arritur barazinë gjinore në nivel global deri në vitin 2030. EULEX-i është plotësisht i zotuar për ta mbështetur këtë synim dhe ta përfshijë perspektivën gjinore duke e fuqizuar sundimin e ligjit në Kosovë.

“Si Shef i Misionit për Sundimin e Ligjit në Kosovë, jam i kënaqur që Kosova e ka miratuar një numër të konsiderueshëm të ligjeve dhe politikave me qëllim të sigurimit të barazisë gjinore. Vitin e kaluar, autoritetet kosovare e kanë miratuar Ligjin e ri për Barazinë Gjinore. Ai e ka një qëllim ambicioz, që ta arrijë nivelin prej 50% të përfaqësimit të secilës gjini në institucionet publike, duke i përfshirë pozitat vendim-marrëse si dhe në sektorët të cilët tradicionalisht ka qenë të dominuar nga meshkujt. Prandaj, është veçanërisht inkurajuese që ne shohim një trend pozitiv dhe shtim të përpjekjeve nga institucionet e Sundimit të Ligjit në Kosovë për ta përmirësuar përfaqësimin gjinor. Megjithatë, ende ka hapësirë për përmirësim, veçmas në zbatimin e plotë dhe efikas të këtyre ligjeve për avancimin e grave drejt pozitave vendim-marrëse”, citohet të ketë thënë Gabriele Meucci, shef i EULEX-it.

“Unë vazhdoj të jem një përkrahës i fuqishëm i të gjitha femrave vendase dhe ndërkombëtare këtu në Kosovë në përpjekjet e tyre për të ndërtuar një sistem efikas dhe të pavarur të drejtësisë duke ofruar qasje të barabartë në drejtësi për të gjithë. Unë i nxis institucionet e Kosovës që ta pasqyrojnë dhe ta vërtetojnë rolin thelbësor të cilin e luajnë gratë në zhvillimin e një shoqërie prosperuese dhe demokratike”, ka potencuar Meucci. /koha.net

Komuna e Prishtinës dhe Handikos me projekt për personat me aftësi të kufizuar

Kryetari i Komunës së Prishtinës, Shpend Ahmeti, ka treguar për projektin e radhës që mëton komuna ta realizojë.

Ahmeti, përmes një postimi në Facebook, ka thënë se Drejtoria e Urbanizmit e Komunës së Prishtinës që një kohë ka filluar punën në eliminimin e pengesave për personat me aftësi të kufizuar.

Të tilla pengesa tha ai se janë të shumta në komunën e Prishtinës dhe shtoi se do të ketë shumë punë.

“Në bashkëpunim me Handikos, kemi identifikuar pengesat në qasje në banesa kolektive dhe shtëpi individuale për personat që jetojnë në këto lokacione dhe gjatë javëve dhe muajve në vijim do të zhvillojmë punimet për të eliminuar këto pengesa apo për ta mundësuar qasjen”, ka thënë Ahmeti.

Ai ka falënderuar në fund të gjithë ata që punuan dhe po punojnë në këtë projekt dhe projekte të tjera për, siç tha ai, “një Prishtinë më të barabartë”. /Koha net

Ministri Zharku pranon se ishte kërcënuar nga OSHP-ja

Ministri i Infrastrukturës, Lutfi Zharku, mbrëmë në emisionin “Ekonomia me Erëzën” të transmetuar në KTV, ka komentuar zhvillimet lidhur me tenderin për mirëmbajtjen dimërore të autostradës “Ibrahim Rugova”.

Tenderi është zvarritur gati një vit deri në shpalljen e kompanisë fituese.

Zharku thotë se ministria që drejton dhe një vartës i tij janë kërcënuar nga Organi Shqyrtues i Prokurimit.

“Po. Ka pasur kërcënime nga ana e OSHP-së ndaj drejtorit të prokurimit. Jemi paralajmëruar se nëse nuk veprojmë në përputhje me vendimin e OSHP-së do t’i merret licenca zyrtarit të prokurimit”, ka thënë Zharku, raporton Koha.net.

Ai nuk pajtohet me faktin se këtë formë komunikimi e përdor OSHP-ja me të gjitha autoritetet kontraktuese. OSHP-ja e ka për obligim ligjor që të njoftojë paraprakisht për mundësinë e pezullimit të licencës.

“Jo, nuk mundet askush të të kërcënojë me licencë”, ka shtuar Zharku.

Përveç kritikave nga ana e OSHP-së lidhur me këtë tender, kishte pasur edhe zhvillime tjera.

Bekim Gojani, anëtar i Komisionit Vlerësues të Tenderit, kishte takuar Bekim Bytyçin e kompanisë “Famis CO”, disa ditë para se kjo kompani të shpallej fituese.

Oferta e saj për një lot të tenderit kalonte shumën e 1 milion eurove. OSHP-ja e kishte anuluar shpalljen fitues të kësaj kompanie.

Zharku tha se mund të jetë koincidencë fakti që anëtari i komisionit është takuar me përfaqësuesin e kompanisë konkurrente. Ai ka thënë se çdo zyrtari mund t’i ndodhë që dikush ta ndalë në rrugë dhe ta përshëndes.

Por, megjithatë thotë se i ka thënë sekretarit të kërkojë përgjegjësi nga Gojani. Zharku deklaroi se nuk është marrë asnjë masë ndëshkuese ndaj Gojanit.

Zyrtari Gojani kishte edhe një problem tjetër para se të angazhohej në Komisionin vlerësues të këtij tenderi. E kishte të pezulluar licencën e prokurimit.

Zharku deklaroi se angazhimi i anëtarëve të komisionit është përgjegjësi e sekretarit të Ministrisë.

“Unë nuk e di. Nuk i emëroj pjesëtarët e komisionit. Me sa e di, nuk e ka pasur të ndaluar të marrë pjesë në vlerësim të tenderit”, ka shtuar Zharku.