Radio Kalabria- Me ju dhe vetem per ju

Shkarkoni audio fajllin per te degjuar radio kalabrine

Posts by Category

Komuna e Prishtinës dhe Handikos me projekt për personat me aftësi të kufizuar

Kryetari i Komunës së Prishtinës, Shpend Ahmeti, ka treguar për projektin e radhës që mëton komuna ta realizojë.

Ahmeti, përmes një postimi në Facebook, ka thënë se Drejtoria e Urbanizmit e Komunës së Prishtinës që një kohë ka filluar punën në eliminimin e pengesave për personat me aftësi të kufizuar.

Të tilla pengesa tha ai se janë të shumta në komunën e Prishtinës dhe shtoi se do të ketë shumë punë.

“Në bashkëpunim me Handikos, kemi identifikuar pengesat në qasje në banesa kolektive dhe shtëpi individuale për personat që jetojnë në këto lokacione dhe gjatë javëve dhe muajve në vijim do të zhvillojmë punimet për të eliminuar këto pengesa apo për ta mundësuar qasjen”, ka thënë Ahmeti.

Ai ka falënderuar në fund të gjithë ata që punuan dhe po punojnë në këtë projekt dhe projekte të tjera për, siç tha ai, “një Prishtinë më të barabartë”. /Koha net

Ministri Zharku pranon se ishte kërcënuar nga OSHP-ja

Ministri i Infrastrukturës, Lutfi Zharku, mbrëmë në emisionin “Ekonomia me Erëzën” të transmetuar në KTV, ka komentuar zhvillimet lidhur me tenderin për mirëmbajtjen dimërore të autostradës “Ibrahim Rugova”.

Tenderi është zvarritur gati një vit deri në shpalljen e kompanisë fituese.

Zharku thotë se ministria që drejton dhe një vartës i tij janë kërcënuar nga Organi Shqyrtues i Prokurimit.

“Po. Ka pasur kërcënime nga ana e OSHP-së ndaj drejtorit të prokurimit. Jemi paralajmëruar se nëse nuk veprojmë në përputhje me vendimin e OSHP-së do t’i merret licenca zyrtarit të prokurimit”, ka thënë Zharku, raporton Koha.net.

Ai nuk pajtohet me faktin se këtë formë komunikimi e përdor OSHP-ja me të gjitha autoritetet kontraktuese. OSHP-ja e ka për obligim ligjor që të njoftojë paraprakisht për mundësinë e pezullimit të licencës.

“Jo, nuk mundet askush të të kërcënojë me licencë”, ka shtuar Zharku.

Përveç kritikave nga ana e OSHP-së lidhur me këtë tender, kishte pasur edhe zhvillime tjera.

Bekim Gojani, anëtar i Komisionit Vlerësues të Tenderit, kishte takuar Bekim Bytyçin e kompanisë “Famis CO”, disa ditë para se kjo kompani të shpallej fituese.

Oferta e saj për një lot të tenderit kalonte shumën e 1 milion eurove. OSHP-ja e kishte anuluar shpalljen fitues të kësaj kompanie.

Zharku tha se mund të jetë koincidencë fakti që anëtari i komisionit është takuar me përfaqësuesin e kompanisë konkurrente. Ai ka thënë se çdo zyrtari mund t’i ndodhë që dikush ta ndalë në rrugë dhe ta përshëndes.

Por, megjithatë thotë se i ka thënë sekretarit të kërkojë përgjegjësi nga Gojani. Zharku deklaroi se nuk është marrë asnjë masë ndëshkuese ndaj Gojanit.

Zyrtari Gojani kishte edhe një problem tjetër para se të angazhohej në Komisionin vlerësues të këtij tenderi. E kishte të pezulluar licencën e prokurimit.

Zharku deklaroi se angazhimi i anëtarëve të komisionit është përgjegjësi e sekretarit të Ministrisë.

“Unë nuk e di. Nuk i emëroj pjesëtarët e komisionit. Me sa e di, nuk e ka pasur të ndaluar të marrë pjesë në vlerësim të tenderit”, ka shtuar Zharku.

Haziri: Ismet Beqiri ia ka borxh LDK-së një veturë

Kryetari i Komunës së Gjilanit, Lutfi Haziri, ka reaguar ndaj djegies së veturës së LDK-së në parkingun e banesës së kreut të Grupit Parlamentar të LDK-së, Ismet Beqiri.

Por, përveç dënimit të djegies së veturës, Haziri ka bërë edhe një deklaratë interesante. Ai ka thënë se vetura është dashur të jetë në parkingun e LDK-së, dhe si rrjedhojë, bashkëpartiaku i tij, Ismet Beqiri, ia ka borxh LDK-së një veturë të tillë.

“Vandalizmin dhe dëmtimin e prones private, si në rastin e djegies së veturave private të Memli Krasniqit e Bajram Gecajt, e së fundi edhe djegien e veturës zyrtare të LDK-së, e dënoj ashpër. Por, dua t’ia kujtoj Ismet Beqirit se vetura ka qenë dashur të jetë në parkingun e LDK-së, e jo në shtëpinë e tij. Nga sot, Ismet Beqiri ia ka borxh LDK-së një veturë të tipit Passat”, ka shkruar Haziri në faqen e tij në Facebook

Njoftim nga Komuna e Prishtinës

Komuna e Prishtinës njofton se IHMK (Instituti Hidrometeorologjik i Kosoves) sot ka paralajmëruar mundesinë vershimeve nga shiu. Numrat emergjent 080012233,08001224 dhe 080012255/Radio Kalabria

Vërshohet nga shiu edhe magjistralja Prishtinë-Pejë

Reshjet e mëdha të shiut që po shoqërojnë vendin kanë bërë që magjistralja Prishtinë-Pejë, përkatësisht vendi i quajtur “Kroni i Mbretit” të vërshohet nga sasia e të reshurave, raporton Indeksonline.

Për të pastruar rrugën ka dal sigurimi i autostradës, pasi që shiu ka vështirësuar qarkullimin e veturave.

Autoritetet u kanë bërë thirrje  ngasësve të veturave që të kenë kujdes në trafik, pasi që rrugët janë vështirë të qarkullueshme.

Po ashtu, nga reshjet e shiu edhe pjesë tjera të magjistrales  Prishtinë-Pejë janë mbuluar me ujë. /Indeksonline/

Iniciativa Qytetare e Goranëve me listën “Aleksandar Vuçiqit -Serbia fiton”

Beograd, 7 mars – Iniciativa Qytetarëve e Goranëve, si një organizatë e vetme unike politike e kombëtare e goranëve në Serbi, do të paraqitet në të gjitha nivelet me listën “Aleksandar Vuçiq – Serbia fiton”, transmeton Koha.net komunikatën e Iniciativës Qytetare të Goranëve.

“Aleksandar Vuçiq, ndryshe nga qeveritë e mëparshme, ka treguar mirëkuptim të plotë ndaj goranëve si një komunitet specifik etnik në Serbi dhe shpesh herë personalisht është angazhuar për zgjidhjen e problemeve me të cilat ballafaqohen goranët në Serbi”, citojnë mediet e Beogradit kryetarin e Iniciativës Qytetare të Goranëve, Orhan Dragash.

Raportimet nuk saktësojnë nëse kjo organizatë i referohet edhe territorit të Kosovës. Një pjesë e goranëve në Komunën e Dragashit vazhdojnë të kundërshtojnë institucionet e Kosovës dhe të shpërfillin pavarësinë e saj. Ata kanë kërkuar komunë në vete, të ndarë nga Dragashi.

Shumica e goranëve, që kryesisht jetojnë në komunë të Dragashit dhe të Prizrenit, kanë njohur Kosovën shtet të tyre. //Koha net

Shiu ndërpret procesin mësimor në Pejë

Shiu që ka rënë mbrëmë dhe që po vazhdon edhe sot në komunën Pejës, ka vështirësuar gjendjen në këtë qytet perëndimor të Kosovës, njofton korrespondenti i Kohës Ditore nga Peja.

Për shkak te gjendjes se krijuar, komuna ka ngritur Shtabin emergjent.

Njëkohësisht është ndërprerë procesi mësimor në të gjitha shkollat./Koha.net

MTI-ja paralajmëron bllokimin e maunave të Serbisë

Qeveria e Kosovës i ka dhënë kohë Serbisë deri në fund të muajit mars për t’i njohur certifikatat e ADR-së të lëshuara nga institucionet e Kosovës.

Këto certifikata janë të nevojshme për transportin e mallrave të rrezikshme, siç janë nafta apo gazi natyral, shkruan sot Koha Ditore.

Qeveria e Serbisë nuk ka lejuar që autobotet e pajisura me certifikatën e ADR-së të lëshuara nga Ministria e Infrastrukturës të hyjnë në territorin e tyre.

Kjo barrierë e vendosur për importuesit e naftës është e vetmja që aktualisht po aplikon Serbia në raport me bizneset e Kosovës. Barrierën tjetër që Serbia ia kishte vendosur prodhuesit të pijeve “Fluidi” tashmë e ka hequr.

Më nuk po ia kërkon që në etiketat e lëngjeve të vendoset vendi i prodhimit “Krahina Autonome e Kosovës dhe Metohisë”. Këtë barrierë Serbia e kishte hequr disa ditë para se të mbahej takimi i CEFTA-s në Bruksel./Koha Ditore

Miliona euro kanë paguar konsumatorët e rregullt për rrymën që e kanë shpenzuar veriorët

Ka shumë qytetarë që mundohen ekstremisht të kursejnë energjinë elektrike sepse janë pagues të rregullt.

Por, nga paslufta, të gjithë ata që kanë paguar energjinë elektrike, e kanë paguar edhe faturën e shpenzimeve të energjisë të serbëve të veriut të Kosovës, raporton KTV.

Kjo për faktin se nga paslufta, institucionet përgjegjëse për lexim dhe faturim të energjisë nuk kanë pasur qasje në atë pjesë. Vlera e borxheve të tyre ka tejkaluar 100 milionë euro.

Një njoftim të tillë nuk e marrin asnjëherë konsumatorët, por kjo vërehet sa herë që operatorët e energjisë aplikojnë në Zyrën e Rregullatorit të Energjisë. Këto borxhe e pagesa futen në pjesën e humbjeve komerciale.

KEDS-i, në përgjigjen e shkurtër, ka thënë se operimin në veri e ka trashëguar nga KEK-u dhe që formati po vazhdon të jetë i njëjti. Sipas tyre, kjo nuk është çështje komerciale, por politike.

Në aplikimin e këtij viti për lejimin e të hyrave, KEDS-i ka sqaruar se humbjet në Veri janë parashikuar si megavat dhe jo si përqindje, ngase edhe humbjet në Veri janë jashtë kontrollit të Operatorit të Sistemit dhe Shpërndarjes.

Sipas të dhënave të prezantuara të KEDS-it, asaj i duhen 4 milionë euro për shpenzimet operative, që kanë të bëjnë me rregullimin e konsumatorëve në veri të lumit Ibër, ku konsumi i energjisë brenda një viti është 243 gigavatë.

Zyra e Rregullatorit të Energjisë, duke u thirrur në problemin politik të asaj pjese, e ka arsyetuar këtë veprim. Të njëjtat probleme ndodhën edhe në pjesë tjera të vendit disa vjet pas luftës, ku serbët nuk pranonin të paguanin energjinë e shpenzuar.KTV

“Subjektet politike në Kosovë vuajnë nga mungesa e demokracisë së brendshme”

Subjektet politike në Kosovë vuajnë nga mungesa e demokracisë së brendshme, vlerësojnë analistët politikë. Sipas tyre, demokracia te subjektet politike vërehet vetëm në letër dhe në deklaratat publike të përfaqësuesve të tyre kur janë para medieve.

Driton Selmanaj, analist politik, thotë për Radion Evropa e Lirë se partive politike në Kosovë, u mungon në thelb demokracia e brendshme.

“Demokracia nuk ekziston te këto subjekte politike. Nuk nënkuptohet demokraci vetëm për të thënë se organizuam një takim, forma se si merren vendimet, roli i grave, roli i të rinjve brenda strukturave politike. Cili është roli i tyre në proceset vendimmarrëse, cili është roli i liderit politik? Ai është absolut”.

“Në Kosovë mund të themi lirisht se kemi parti lideriste dhe më së paku mund të flasim për parti në kontestin e demokracisë së brendshme se si do të duhej të funksiononte një organizatë politike”, thotë Selmanaj.

Edhe Petrit Zogaj, analist dhe drejtor ekzekutiv i organizatës “Fol”, në një prononcim për Radion Evropa e Lirë, thotë se partitë politike luajnë një rol qenësor në zhvillimin e demokracisë, por përvojat kanë treguar se në Kosovë partitë pothuajse më shumë ekzistojnë për të përfituar, se sa për të punuar për të mirën e përgjithshme.

“Formalisht, kemi parti, të cilat kanë proceduara, mirëpo jo formalisht kemi grupe [brenda partive], të cilat i menaxhojnë këto parti politike. Madje, kemi parti, të cilat kanë edhe këtë mbiemrin demokratike, lidhje demokratike, mirëpo funksionimi i tyre i brendshëm çalon shumë”, konsideron Zogaj.

Analisti Selmanaj thekson se liderët politikë, me veprimet e tyre, me demokracinë e tyre, i kanë sjellë Kosovës kriza të njëpasnjëshme politike dhe, siç thotë ai, gjendjen, në të cilën ndodhet Kosova në aspektin politik është për keqardhje.

“Ne kontestin e zhvillimit të brendshëm politik dhe demokratik të institucioneve, në funksion të përmirësimit të jetës së qytetarëve që jetojnë këtu, atëherë duket se kjo klasë politike me këtë mendësi politike, nuk mund të shkojë më tutje”.

“Përfundimisht duhet qasje tjetër. Kjo mund të bëhet me angazhim të njerëzve të rinj brenda këtyre subjekteve politike, duke u hapur këto subjektet politike, duke ofruar kuadro, duke ofruar qasje tjetër, duke ofruar alternativa dhe platforma politike të tjera”, vlerëson Selmanaj.

Ndërkaq, sipas Zogajt, Kosovës i nevojitet që të ketë parti politike me demokraci të brendshme, ashtu që interesi i qytetarëve të jetë në agjendat e tyre.

“E kemi parë në seancën e fundit të Kuvendit të Kosovës, ku në votimin e parë për president, ne kemi parë që vetëm 50 vota kanë qenë në favor të kandidatit për president që ishte zoti Thaçi, pastaj shkoi duke u ndryshuar vullneti politik i 21 deputetëve të Kuvendit ë Kosovës”.

“Ky është shpjegimi më i qartë se si subjektet politike e kanë ngulfatur edhe vullnetin e deputetëve, por edhe debatin për politika të caktuara, ose për vendime të caktuara të partive”, thekson Zogaj.

Analistët politikë thonë se partitë politike në Kosovë, interesin më të madh e kanë të marrin pushtet, e jo ta mbrojnë e ta çojnë përpara shtetin.

Sipas tyre, të gjitha partitë luftojnë për t’u bërë pjesë e Qeverisë, por jo e demokracisë.